يالله يامجري هبوب النســـــانيس = وجــــــلاي نوره لاتخايط عتيمه
عــلام ماتخفي الصدور المقـاويس = محيي الغصون اليابسـات الهشيمه
الشـــعرمغزى والفكروالهـواجيس = تأرد وتروى للعقــــــــــول الفهيمه
وأنا دليـلي مبعـــــــدين المراميس = في عصرنا ولاّ العــــصور القديمه
أشعلت من فكري لشعري فوانيس = القــدح قــدحي والنـــــــــوايا مقيمه
سباح وأسبح في بحـــور ٍ بلاقيس = وأســـمع لشور أهل العقول الحكيمه
أفك باب المغـــــــلقات المحابيس = بالعـــــــدل ترضى ماتـجي بالظليمه
تطيع داعيها وجتني كـــــراديس = بالغـصب ماأغصبها ولاأقبل هزيمه
اللي بناء بيته على سـاس ماسيس = ماله على التاريخ ماضي وســــــيمه
من لايمجد له فعـــــول ونواميس = أمه عســـــــــــــاها في زمنها عقيمه
ومن لايعرب منســـــبه للقرانيس = أجـــــــمال ورده من ظماها محيمه
أسم الدهينه هيبة ٍ تســــبق الكيس = لاجــــــــــاء نهار ملاويات الشكيمه
في ساعة الأرياق تنشف ويبيس = وعنها يتحــــــادى من يذب الخريمه
يبديلها مقعد زبون المعابيس = لاطوحن له لابسات اللثيمه
يضحك حجاجه ماأنكفت به مفاليس = يارد حياض الموت للروح شيمه
وكم شيخ قوم ٍ لحقه رووس فريس = يسبق نذير السيف سطوة جحيمه
من هيبته فرق جموع ٍ مراويس = مخلي ظهور الخيل وشداد ريمه
دوس الخطر دربه وللرجل ماديس = وناب الدهر وحنوك بقعاء وليمه
لاكبرت القاله يفك المغاليس = وكن الفعايل من فعوله يتيمه
عون الضرير اللي عليه المضاريس = دارت وظامه فالليالي غريمه
رأس ٍ تعلاّ الرووس فالوقت ماريس= سيل ٍ قفاه من أحمر الدم ديمه
يشيب من فعله غرير ٍ على الديس = كل الخلايق من وصوفه عديمه
شبه الجزيره ماوفت بالقواميس = وعن فعله التاريخ يصبح نديمه
لو الشجاعه منهج ٍ وله تدريس = كل المناهج مالها أيات قيمه
عن حكمته لو كدس العرف تكديس = همش عقول ٍ في زمنها حليمه
ولا مات مقعد باقي(ن) للمجاليس = سلطان ذكره هيبة(ن) له لجيمه
النار موعدها حراق المحاميس = واللي على الساقه حرار ٍ هميمه
تاج الفخر ماحولوبه على السيس = وعنهم كديش الخيل تلقى صتيمه
استغفر الله لويمين المغاميس = قلت اليماني من سخاها ثليمه
حلم الليالي صحوته للكوابيس = اللي دوافعها تعوّد وخيمه
ومن يستعن بالله ويعوذ أبليس = يرجع لوقته وش مصادر زعيمه ؟
يالله بنو ٍ لاتركز مكاديس = قام يتهادى من رفيفه رزيمه
كن القنابل فالمثاني مقابيس =والنور كفه من دماسه ظليمه
وقام يتداحم مدلهم المداميس = وأرخاء سبوله في مسامع حتيمه
يسكب هميله من عيون النواعيس =و ينحب رعدها ويتوالا هشيمه
على قبر مقعد تعل المتاريس = وتنثر مقاديمه ويركد نسيمه
يأخذ تراديده ويأخذ مراويس = وإن بكرالوسمي يعله وسيمه
يقر ماه وروضة القبر مانيس = والغصن ماساق اليباس لصريمه
ماأحصيت فعله بركن دونه العيس = يبعد مداه ولالحقنا عظيمه
قول الحقيقه فالوجيه المباليس = عن عرفها صدت وجيه الحشيمه
والحق واضح مايجي فيه تهجيس = وشيطانها أخرس من سكت له غنيمه